အင်္ဂလိပ်စာလေ့လာရမှာပျင်းတဲ့သူတွေရော အင်္ဂလိပ်စာတော်နိုင်သလား

ဒီနေ့ခေတ်မှာ အင်္ဂလိပ်စာဆိုတာ ဝါသနာပါမှ စိတ်ဝင်တစားလေ့လာတတ်မြောက်ရမှာမဟုတ်ပါဘူး။ သူများတွေနဲ့ဆက်သွယ်ဖို့ပဲဖြစ်ဖြစ်၊ ကိုယ်သိချင်တာ၊ လေ့လာချင်တာတွေအလွယ်တကူ သိရဖို့ပဲဖြစ်ဖြစ် အကြောင်းရင်းများစွာအတွက် မတတ်ရင်မဖြစ်တဲ့ ဘာသာစကားပါ။ ထမင်းစား၊ ရေသောက်တာလိုမျိုး စိတ်ဝင်စားသည်ဖြစ်စေ မဝင်စားသည်ဖြစ်စေ လုပ်ဖို့လိုပါတယ်။ ဒါဆို ဘယ်လိုလုပ်မလဲ။
*

အကောင်းဆုံးကတော့ စနစ်တကျနဲ့နေ့စဉ်အချိန်တစ်ခုပေးလေ့လာသွားရင် ပိုပြီးမြန်မြန်ဆန်ဆန် တတ်တာပါပဲ။ ဒါပေမဲ့ ဒီလိုအင်္ဂလိပ်စာလေ့လာနေရတာ ပျင်းရင်လည်းပျင်းမှာပေါ့။ မလေ့လာချင်ဘူးဆိုပြီး လက်လျှော့လိုက်မလား။

ကိုယ်ကိုယ်တိုင်ကလည်း လူပျင်းဆိုတော့ အင်္ဂလိပ်စာလေ့လာရမှာလည်း ပျင်းပါတယ်။ ဒါပေမဲ့ အင်္ဂလိပ်စာမလေ့လာဘဲ အင်္ဂလိပ်စာတော်ချင်ပြန်ရော။ ဒီတော့ ကိုယ်လိုလူမျိုးရှိရင်လည်း စိတ်ကူးရအောင်ပြောချင်ပါတယ်။

•  အင်္ဂလိပ်စာ မလေ့လာပါနဲ့။ ကိုယ်လုပ်ချင်တာ ကိုယ်လုပ်ပါ။ ဘာလုပ်ချင်လဲ။ ဇာတ်ကားကြည့်ရတာ ဝါသနာပါလား။ ရတယ်။ နေ့တိုင်းသာကြည့်။ ကြည့်တယ်ဆိုထဲက အင်္ဂလိပ်စာတန်းထိုးနဲ့တော့ကြည့်ပေါ့။ နားလည်လည်မလည်လည် ဇာတ်ကားတော့ ပြီးသွားမှာပဲ။ နေ့တိုင်းကြည့်နေရင်တော့ စကားလုံးတွေ၊ နားထောင်စွမ်းရည်တွေ အတော်တိုးတက်လာမှာပါပဲ။ မြန်မာစာတမ်းထိုးနဲ့ကြည့်လည်း ရပါတယ်။ နားရည်ဝဖို့ နည်းနည်းတော့ ပိုကြာတာပေါ့။ ကြည့်စမ်းပါလေ့။

•  မလုပ်ရင်မဖြစ်တဲ့ အလုပ်တွေမှာ အင်္ဂလိပ်စာထည့်ပေါင်းကြည့်ပါ။ ဥပမာ ထမင်းဟင်းချက်ပြုတ်နေတယ်ဆိုပါတော့။ ဖုန်းလေးနဲ့ပဲဖြစ်ဖြစ် အင်္ဂလိပ်စာသင်ခန်းစာတွေ ဖွင့်ထားလိုက်ပါ။ သူလည်းပြောချင်တာပြော ကိုယ်လည်း လုပ်ချင်တာလုပ်ပေါ့။ ကိုယ်လုပ်တဲ့အလုပ်က တစ်နာရီကြာရင် ကိုယ်နားထောင်မိတာ ဆယ်မိနစ်လောက်တော့ ရှိမှာပေါ့။ နေ့တိုင်းသာလုပ်ဖြစ်ရင် ဆယ်မိနစ်ကလည်း အတော်ခရီးရောက်ပါတယ်။

• အင်္ဂလိပ်စာလေ့လာဖို့ရည်ရွယ်ချက်နဲ့ Grammar/Vocabulary/Idioms စတာတွေ နေ့တိုင်းလုပ်မနေပါနဲ့ပျင်းစရာကြီး။ ကိုယ်ကြိုက်တာသာ ဖတ်နေပါ။ ကာတွန်း၊ ဝတ္ထုတို၊ သတင်းစတာတွေ ဖတ်ပါ။ အင်္ဂလိပ်လိုတော့ ဖတ်။ မသိတာရှိရင် Dictionary မှာရှာပြီး စာလုံးကိုမှတ်၊ ကျက်နေတာမလုပ်နဲ့။ စကားအဆက်အစပ်ကြည့်ပြီး မှန်းသာဖတ်။ အချိန်ကြာရင် Grammar/Vocabulary/Idioms စတာတွေ အလိုလိုတတ်နေတာ တွေ့ရလိမ့်မယ်။ တချို့က ကဗျာဝါသနာပါလို့ ကဗျာတွေ စုဆောင်းဖတ်တယ်။ တချို့က မိန့်ခွန်းတွေစိတ်ဝင်စားလို့ ရှာဖတ်တယ်။ တချို့ကလည်း စီးပွားရေးပညာစိတ်ဝင်စားလို့ ဖတ်ကြည့်တယ်။ ရတယ် ကြိုက်တာသာဖတ်။ အရှုံးမရှိဘူး။ ပညာရပ်တွေမတတ်လာရင်တောင် အင်္ဂလိပ်စာတိုးလာလိမ့်မယ်။

• စာသင်ပေးစရာ ရှိတဲ့သူတွေကစာသင်ပေးပါ။ ညီအစ်ကို မောင်နှမတွေ၊ ပညာဒါနတွေ၊ ဒါမှမဟုတ်လည်းအခကြေးငွေနဲ့စာသင်ပေးပါ။ တခြားသူတွေကို စာသင်ပေးတာကလည်း ကိုယ်အတော်တတ်စေတဲ့အလုပ်ပဲ။ အငယ်တန်းလေးတွေကို သင်ပေးမယ်ဆို ကိုယ့်မှာအခြေခံတွေ ပိုင်နိုင်လာလိမ့်မယ်။ မသင်ဘူးသေးတဲ့ အတန်းတွေ၊ စာတွေပြောင်းလဲပြီး သင်ပေးကြည့်ပါ။ ကိုယ်မတတ်ချင်ရင်တောင်တတ်လာလိမ့်မယ်။

ခုပြောတာက အင်္ဂလိပ်စာ လေ့လာရမှာပျင်းတဲ့သူတွေအတွက်နော်။ ဘာမှမလုပ်ချင်ဘူးဆိုတဲ့ အပျင်းတွေအတွက်တော့မဟုတ်ဘူး။ နားလည်ထားရမှာက ကိုယ်ကပျင်းတယ်ဆိုရင် စနစ်တကျ ဝီရိယကောင်းကောင်းနဲ့ အသည်းအသန်ကြိုးစားတဲ့သူတွေကို မီစရာတော့ ရှိမှာမဟုတ်ဘူး။ (မီချင်တယ်/ပိုသာချင်တယ်ဆိုလာတဲ့သူကလည်း အတော်ရူးတဲ့သူပဲဖြစ်မယ်) ဉာဏ်ရည်ဉာဏ်သွေးရှိတဲ့သူ၊ဇွဲလုံ့လရှိတဲ့သူ၊ စနစ်ကျတဲ့သူတွေကတော့ ဘယ်နေရာမှာမဆို ပြိုင်ဘက်ကင်းတော်တဲ့ဖြစ်မှာပါပဲ။

အင်္ဂလိပ်စာလည်း လေ့လာရမှာပျင်းလို့ မဖြစ်မနေအလုပ်တွေထဲမှာ ထည့်ပေါင်းနေတယ်ဆိုရင် ကြိုးစားနေတဲ့သူတွေကို မီစရာအကြောင်းတော့မရှိပါဘူး။ ဒါပေမဲ့ လက်ရှိအခြေအနေထက်တော့လည်း ပိုညံ့မသွားဘူးလေ။ လုပ်ကြည့်ပါဦး။

ဆရာစည်သူထက်