အင်္ဂလိပ်စာတတ်မြောက်ဖို့ ဘယ်စာအုပ်တွေ လေ့လာသင့်သလဲ (၂)

ဒီတစ်ခါတော့ အသုံးအနှုန်းစာအုပ်လေးတစ်အုပ် ညွှန်းပါရစေ။ "Michael Swan" ရဲ့ “Basic English Usage" ဆိုတဲ့ စာအုပ်ပါ။

ဒါ့ထက်ပိုပြည့်စုံတဲ့ Advanced အဆင့်ဖြစ်တဲ့ “Practical English Usage" ဆိုတဲ့ စာအုပ်လည်း ရှိပါသေးတယ်။ “Practical English Usage" က အဆင့်မြင့်ဖြစ်တဲ့အတွက် ဒီစာအုပ်ကို ရည်ညွှန်းကိုးကားဖို့ပဲ ထားလိုက်ပြီး “Basic English Usage" ကိုတော့ အပြည့်အစုံလေ့လာနိုင်ရင် ကောင်းပါတယ်။

“Basic English Usage" ဟာ grammar စာအုပ်တစ်အုပ် မဟုတ်ပါဘူး။ အသုံးအနှုန်း အမှန်အမှားဆိုင်ရာ သိသင့်သမျှအားလုံး ထည့်ပေးထားတဲ့ စာအုပ်ပါ။ စာအုပ်ဖွဲ့စည်းပုံကလည်း နည်းနည်းထူးခြားပါတယ်။ Unit အလိုက်စီထားတာ မဟုတ်ဘဲ အက္ခရာစဉ်အလိုက် စီထားတာပါ။ စာမျက်နှာကိုလည်း အကြောင်းအရာပေါ်မူတည်ပြီး တပ်သွားပါတယ်။ သမားရိုးကျ တပ်ပုံမဟုတ်ပါဘူး။ ဒီတော့ လေ့လာတဲ့အခါ ကိုယ်သိချင်တာကို ရှေ့ဘက်က မာတိကာမှာရှာပြီးတော့ပဲဖြစ်ဖြစ်၊ နောက်ဘက်က Index မှာကြည့်ပြီးပဲဖြစ်ဖြစ် အလွယ်တကူရှာဖွေလေ့လာနိုင်ပါတယ်။ ကိုယ်သံသယရှိတာကို အလွယ်တကူ ရှာဖွေလေ့လာနိုင်တဲ့ Reference စာအုပ်အနေနဲ့လည်း တန်ဖိုးရှိပါတယ်။

စာအုပ်မှာ ပါတာကို ဥပမာပေးရရင် bring နဲ့ take ဘာကွာလဲ သိပါသလား။ tall နဲ့ high ဘယ်လိုမတူလဲ။ over/across/through သုံးနှုန်းပုံတွေ ခွဲခြားတတ်ရဲ့လား။ ဒါတွေတင်မက articles တွေ သုံးပုံ၊ Adverbs တွေ နေရာထားပုံ၊ အသံထွက်တဲ့အခါ weak forms နဲ့ strong forms တွေနားလည်ပါသလား။ စာအုပ်ထဲမှာဒါတွေအပြင် မှားတတ်တာအားလုံး၊ သိသင့်တာအားလုံးကို အင်္ဂလိပ်စာလေ့လာသူတွေအတွက် စုံလင်နေအောင် ရှင်းလင်းထားပါတယ်။ သရုပ်ဖော်ပုံတွေ၊ ဇယားတွေ၊ ဥပမာတွေ ဝေဝေဆာဆာသုံးပြီး ရှင်းခနဲလင်းခနဲဖြစ်သွားအောင် အားထုတ်ထားတဲ့စာအုပ်ပါ။

ဒီစာအုပ်ကို ဘယ်လိုလေ့လာသင့်သလဲ ဆိုတာ အကြံပေးရရင်-

√ ကိုယ်လေ့လာချင်တာကို အရင် ရှာလိုက်ပါ။ အဲဒီစာမျက်နှာကို လှန်ပြီး ဖတ်ပါ။ အစဉ်တိုင်းဖတ်သွားပြီး စိတ်မဝင်စားတာတွေ၊ သိပြီးသားတွေကို ချန်ခဲ့လည်း ရပါတယ်။

√ ဖတ်ထားသမျှ အကြမ်းဖျင်းမှတ်စုလေးတွေ ထုတ်ထားပြီး မှတ်စုကို ပြန်ဖတ်ပေးပါ။ နားမလည်သေးရင် မူရင်းစာအုပ်ကို ပြန်ဖတ်ပါ။

√ လုပ်နိုင်သေးရင် ကိုယ်ပိုင်ဝါကျလေးတွေ ဖွဲ့ကြည့်ပါ။ ကိုယ်လေ့လာထားပြီးသားတွေနဲ့ ဆက်စပ်နှိုင်းယှဉ်ကြည့်ပါ။

“Basic English Usage" စာအုပ်ကို စာအုပ်ဆိုင်ကြီးအများစုမှာ မေးဝယ်လို့ရပါတယ်။ စာအုပ်တန်ဖိုးကတော့ တစ်ထောင်ပါ။ ဈေးနှုန်းအနည်းငယ် ကွာနိုင်ပါတယ်။ “Practical English Usage" စာအုပ်တန်ဖိုးကတော့ တစ်သောင်းပါ။ ကျွန်တော်ကတော့ မျက်စိမှိတ်ဝယ်လိုက်ပါတယ်။

လေ့လာသင့်တဲ့စာအုပ်တွေ ထပ်မံညွှန်းပေးပါဦးမယ်။

ဆရာစည်သူထက်